Buuza Kamisona 37

Mwebale aba URA, njagala kumpabula bwe nsanga emmotoka ng’ekukusa ebyamaguzi nkola ntya?

Okukusa ebyamaguzi, nga muno mutwaliramu okubiyingingiza n’okubifulumya eggwanga ng’omuntu tayise mu mitendera mituufu n’ekigendererwa ky’okwebalama okusasula omusolo musango ogusobola okuviirako oyo eyeenyigidde mu bikolwa ebyo okuvunaanibwa mu mateeka nga bwe gumukka mu vvi aweesebwa engassi oba okusibwa oba okuweebwa ebibonerezo byombi. Bwe weesanga ng’otegeddeko omuntu akukusa ebyamaguzi, nkusaba otutuukirire ku ssimu; 0772141075, ensonga eyo yaakugobererwa tulwanyise omuze ogwo.

Bwe mbeera nga bizinensi yange tekola magoba, aba URA mulina engeri gye muyinza okundiyirira olw’omusolo gwe mbeera nabawa?

Omusolo guggyibwa ku nnyingiza ya bizinesi, ekiseera ky’emala ng’ekola amagoba oba ettunzi erikkirizibwa okuggyibwako omusolo mu mateeka. Bizinesi bw’etuuka ekiseera nga tekyakola magoba oba kukola ttunzi liggyibwako musolo, teri musolo gugiggyibwako, wabula okubirizibwa okusigala ng’ogiteeramu litaani, wasigalewo empuliziganya wakati wo ne URA.

Nze Robert, nagula emmotoka ng’erina amannya g’erimu ne sigikyusizaawo ne nsooka ngidaabiriza okumala ebbanga. Ng’enda okumaliriza nga waliwo emmotoka endala erina enamba ezifaanana n’eyange era kati simanyidde ddala kyakukola?

Mukulu Robert, kya buvunaanyizibwa okukyusa obwannannyini bw’emmotoka nga waakagigula (etteeka likuwa ennaku 14 okukyusa obwannannyini oluvannyuma lw’okugigula). Kyokka bwe weesanga nga tewagikyusa mu budde ng’ate erina ennamba efaanana n’eyoomulala, nkusaba otuukirire woofiisi ya minisitule y’ebyentambula esangibwa ku kitebe kya URA e Nakawa, ensonga eyo egonjoolwe.

Jjukira nti oteekeddwa okujja n’emmotoka yo okwekebejjebwa (verification), nga wano ojja kusasula ensimbi 12,000 mu bbanka oluvannyuma lw’okuweebwa akapapala okusasulirwa.

Hamidah; nsaba kumpa mulimu gwa kubangula bantu mu by’emisolo mu kitundu ky’embeeramu e Mityana.

Mukyala Hamidah, ekitongole kya URA kirina obuvunaanyizibwa bw’okubangula abantu mu nsonga z’omusolo. Kyokka bw’oba wandyetaaze okutwegattako okubangula abawi b’omusolo, tulina enteekateeka y’obwannakyewa mwe tukolaganira wamu n’abantu ab’enjawulo okubunyisa enjiri y’omusolo ng’eno emanyiddwa nga Voluntary Income Tax Assistant (VITA). Nkusaba okwatagane ne woofiisi evunaanyizibwa ku kusomesa omusolo ng’eno esangibwa ku mwaliiro gwa 15 ku kizimbe kya Pearl Tower mu Kampala, ensonga eno eyogerweko.

Singa nsalawo obutasasula musolo, mbeera nfiiriddwa ki nga Munnayuganda?

Bw’osalawo obutasasula musolo kyokka ng’oli mw’abo abalina okugusasula oba olyazaamaanyizza eggwanga lyo kubanga buli buweereza bw’ofuna okuli obukuumi, enguudo, obujjanjabi mu malwaliro ga gavumenti n’obuweereza obulala bukolebwako nsimbi ya muwi wa musolo. Mu mbeera endala otaataaganyizibwa mu bizinesi yo kubanga tosobola kugiddukanya nga tesasudde musolo, nga muno muvaamu n’okuvunaanibwa mu mateeka. N’olwekyo nkukubiriza okutuukiriza obuvunaanyizibwa bwo ku musolo olwo weeyagalire mu ggwanga lyo mu mirembe.

Hakimu. Kisoboka okubayita ne mubeerako bye mumpabula mu by’emisolo eri bizinensi yange?

Mwami Hakimu, kituufu, osobola okuyita ekitongole kya URA okukulambika ku nkwata y’ensonga zo ez’omusolo. Tuukirira woofiisi ya URA eri mu kitundu kyo ofune obuyambi ku nsonga eyo. Ng’oggyeeko ensonga z’omusolo, osobola n’okuyambibwa mu ngeri y’okuddukanya bizinesi yo nga kino kikolebwa ku bwereere. Ne bw’oba weetaaze okuyambibwa ku nsonga z’omusolo kyokka nga tewandyetaaze tutuuke ku bizinesi yo, tukubire ku nnamba zaffe ezitasasulirwa; 0800117000 oba 0800217000. 

Florence; Ssebo Kamisona olaba nga kya buntu mu ngeri gye mukolamu kuba natandika business, ne wayita ennaku bbiri zokka ab’omusolo ne bajja ne banzigalawo nti sinasasula musolo?

Mukyala Florence omusolo guwoozebwa okuyita mu mateeka, era teri bizinesi etannakola magoba oba kufuna ttunzi likkirizibwa kuggyibwako musolo eteekeddwa okusasula omusolo. Jjukira nti bizinesi zirina ebisaanyizo eby’enjawulo bye zirina okutuukiriza okukola okuli okusasula layisinsi (okuweebwa olukusa okukolera mu kitundu) nga eno esasulwa nga tonnatandika kukola.

Ku nsonga y’omusolo, bwe weesanga mu mbeera eyo, nkusaba otuukirire akulira woofiisi ya URA mu kitundu mw’osangibwa ajja kukola ku nsonga eyo.

Nkola ki gye muyitamu okuleeta emisolo emipya kuba siwulirangako nga batwebuzaako nga ffe abaguwa ne tubawabulamu ku nkola entuufu bwe yandibadde.

Emisolo emipya gireetebwa nga kiva ku ngeri ebyenfuna by’eggwanga gye biba bitambulamu, n’obwetaavu bwa gavumenti okuyingiza ensimbi ezigiyambako okuddukanya eggwanga. Abantu bangi abeebuuzibwako okuli ebitongole by’obwannakyewa, ebikwanaganya abasuubuzi n’abantu ba bulijjo.

Add to Bookmarks
Please login to bookmark Close
Add to Bookmarks (0)
Please login to bookmark Close

No Comments yet!

Your Email address will not be published.

Skip to content